ПАЁМИ ТАБРИКОТИИ ДИРЕКТОРИ ИНСТИТУТИ ФАЛСАФА, СИЁСАТШИНОСӢ ВА ҲУҚУҚИ БА НОМИ А.БАҲОВАДДИНОВИ АМИТ, ДОКТОРИ ИЛМҲОИ ФАЛСАФА, ПРОФЕССОР МАҲМАДИЗОДА НОЗИМ ДАВЛАТМУРОД БАХШИДА БА РӮЗИ ПРЕЗИДЕНТИ ҶУМҲУРИИ ТОҶИКИСТОН ВА СОЛГАРДИ ИҶЛОСИЯИ ТАЪРИХИИ XVI ШӮРОИ ОЛӢ

Ҳамкорони_муҳтарам, устодони донишвар, муҳаққиқони соҳибназар ва дӯстдорони илму хирад!

Бо эҳтиром ва самимияти баланд Шуморо ба ифтихори Рӯзи Президенти Ҷумҳурии Тоҷикистон ва солгарди Иҷлосияи тақдирсозу таърихии XVI Шӯрои Олӣ, ки ҳамчун нуқтаи оғозини сулҳу субот, эҳёи давлатдорӣ ва худогоҳии миллии тоҷикон дар таърихи муосир мақоми устувор дорад, табрик менамоям.

Иҷлосияи XVI — ин саҳифаи рӯшантарини таърихи навини тоҷикон аст. Дар он лаҳзаҳои сарнавиштсоз, ки кишвар ба коми буҳрони бисёрсоҳа фурӯ рафта буд, иродаи сиёсӣ, ҷасорати давлатӣ ва ҳисси баланди миллӣ бо шахсияти Пешвои миллат мутамарказ гардида, роҳи наҷот ва рушди минбаъдаро муайян намуд. Ин рӯйдод ба ҷомеа нишон дод, ки давлатдории миллӣ танҳо бо такя бар ваҳдат, хирад, адолат ва иродаи устувори сиёсӣ устувор мемонад.

Бинобар ин, мо Иҷлосияро танҳо як воқеаи сиёсӣ не, балки мактаби худшиносии миллӣ, сабақи давлатсозӣ ва арзишномаи давлатдории муосир медонем.

Маҳз ҳамин рӯзҳо ба миллати мо меъёрҳои навини рушд, биниши стратегӣ, фарҳанги сулҳофарӣ ва маданияти баланди давлатдориро эҳдо намуданд.

Дар ин замина, Рӯзи Президенти Ҷумҳурии Тоҷикистон ҳамчун ҷашни эҳтиром ба хизматҳои таърихӣ, масъулияти давлатсозӣ, вафодорӣ ба арзишҳои миллӣ ва арҷгузорӣ ба роҳбари навинандеши миллат ташаккул ёфт. Ин рӯз ҷаҳонияти сиёсии давлатро бо худшиносӣ ва рисолати таърихии тоҷикон тавъам сохт.

Имрӯз, дар фазои орому суботи миллӣ, аз аҳли илм ва ҷомеаи фикрӣ талаб карда мешавад, ки:

мафкураи давлатдорикунии муосирро бо такя ба арзишҳои миллӣ таҳким бахшанд;

таҳқиқоти илмии сиёсӣ, фалсафӣ ва ҳуқуқиро ба таҳлилҳои амиқи стратегӣ табдил диҳанд;

насли ҷавонро бо шинохти илмӣ аз таърихи давлатдории навини тоҷикон шинос намоянд;

фазои маърифатӣ ва фарҳанги сиёсиро бо андешаи созанда ғанӣ гардонанд.

Институти мо, ҳамчун яке аз ниҳодҳои бонуфузи фикрӣ ва таҳлилӣ, минбаъд низ бо такя ба меҳнати муҳаққиқони соҳибтаҷриба, устодони донишманд ва ҷавонони истеъдодманд дар ин ҷода пешсаф хоҳад монд.

Мо вазифадорем, ки давлатдории навини тоҷиконро ҳамчун падидаи илмӣ, таърихӣ ва иҷтимоӣ бо методҳои муосири таҳлилӣ омӯзем ва барои таҳкими суботи давлатӣ заминаҳои илмӣ фароҳам оварем.

Бо камоли эҳтиром таманно дорам, ки ин ҷашни муқаддаси миллӣ ба ҳар хонадон файзу баракат, ба ҷомеа оромӣ, ба илму дониш файзи тоза ва ба Ватани азизамон пешрафтҳои нав бахшад.